Оюу толгой үйлдвэр 2011 оноос хойш Монгол Улсын Засгийн газрын зөвшөөрлийн дагуу Гүний хоолойн уст давхаргаас ус татан уурхайн үйл ажиллагаандаа ашиглаж буй. Энэхүү орд нь орон нутгийн малчдын ундны усны эх үүсвэрээс тусдаа эх үүсвэртэй бөгөөд газрын гадаргаас 150-400 метрийн гүнд оршдог байна.
Уурхай руу ус татах системд 28 худаг, шахуургын станц, дамжуулах хоолой багтдаг бөгөөд үр ашигтай, алдагдалгүй ашиглах үүднээс нарийн хяналт тавин ажилладаг аж.
Сүүлийн таван жилийн дунджаас үзэхэд уурхайн үйл ажиллагаанд ашиглаж буй усны бодит хэрэглээ ус ашиглах зөвшөөрөгдсөн хэмжээний 56.5%-тэй тэнцэж байгаа юм.
Оюу толгой үйлдвэр усны нөөц ашигласны төлбөрт ямар тарифаар хэдэн төгрөг төлдөг вэ?
2022 оны 11 дүгээр сар хүртэл Оюу толгой Монгол Улсын Засгийн газрын 326 дугаар тогтоолын дагуу 1 шоо метр ус ашигласны төлбөрт 959.04 төгрөг төлдөг байсан. 2022 оны 11 дүгээр сард Монгол Улсын Засгийн газрын 416 дугаар тогтоолоор тарифыг 75 хувиар нэмэгдүүлж 1678.32 төгрөг болгосон.
Оюу толгой үйлдвэр 2023 оны нэгдүгээр сараас ус ашигласны төлбөрөө энэхүү нэмэгдүүлсэн тарифаар буюу 1 шоо метр ус ашигласны төлбөрт 1678.32 төгрөг, 2013 оноос хойш нийт 218 тэрбум төгрөгийг энэхүү төлбөрт төлөөд байна. Энэ тариф нь зөвхөн газрын доорх усны нөөцийг ашигласан төлбөр юм. Харин ус олборлох болон зөөвөрлөх бусад дэд бүтцийн зардлыг Оюу толгой өөрөө хариуцдаг.
