Украины Ерөнхийлөгч Владимир Зеленский АНУ болон Израиль Ираны эсрэг дайн явуулж буй энэ үед Орос улс Иранд тагнуулын мэдээлэл нийлүүлсээр байгаа тухай “няцаашгүй нотолгоо” Украинд байгаа гэж мэдэгджээ. Тэрбээр энэ талаар Украин улсын Батлан хамгаалах яамны Тагнуулын ерөнхий газрын дарга Олег Иващенког илтгэл тавьсны дараа гуравдугаар сарын 23-ны даваа гарагт мэдээлсэн байна.
Зеленский Telegram сувагтаа “Оросууд Ираны дэглэмд тагнуулын мэдээлэл үргэлжлүүлэн өгч байгааг батлах няцаашгүй баримт бидэнд байна. Орос улс радио-техникийн болон радио-электроникийн тагнуулын өөрийн чадавхи, мөн Ойрхи Дорнод дахь түншүүдтэй харилцан солилцсон мэдээллийн нэг хэсгийг ашиглаж байна” гэж бичжээ.
Украины удирдагч дараа нь X (хуучнаар Twitter) платформ дээр Оросын үйл ажиллагааг “илт хорлон сүйтгэх шинжтэй бөгөөд үүнийг зогсоох шаардлагатай” гэж онцолсон байна. Мөн “Ираны дэглэмийг тогтвортой байлгаж, илүү нарийвчлалтай цохилт хийхэд нь тусалснаар Орос улс дайныг бодитоор сунгаж байна. Үүнд хариу арга хэмжээ авах шаардлагатай” гэж мэдэгджээ.
АНУ ОХУ-ыг Иранд тагнуулын мэдээлэл хуваалцахгүй байхыг хүсчээ
АНУ-ын Ерөнхийлөгч Дональд Трампын тусгай элч Стивен Уиткофф гуравдугаар сарын 8-нд ОХУ-д Иранд дэмжлэг үзүүлэхгүй байхыг онцлон хүссэн талаар мэдээлсэн. Үүний дараа тэрбээр ОХУ-ын удирдлагууд Трамптай утсаар ярих үеэр Иранд тагнуулын мэдээлэл дамжуулсан гэх мэдэгдлийг няцаасан гэж хэлжээ.
Уиткофф “Тэдний үгэнд итгэж болно. Тэд мэдээлэл дамжуулаагүй байх гэж найдаж байна” гэж тэмдэглэсэн байна. Өмнө нь The Washington Post сонин “Москва Иранд Ойрхи Дорнод дахь Америкийн цэргийн хүчнийг онилох довтолгоонд ашиглах тагнуулын мэдээлэл өгч, ийнхүү шууд бусаар дайнд оролцож байна” гэж мэдээлсэн байна.
WSJ: ОХУ Украин дахь дайны туршлага дээрээ тулгуурлан Иранд тусалж байна
The Wall Street Journal сонины мэдээлснээр, ОХУ Исламын Бүгд Найрамдах Ирантай хийж буй цэргийн хамтын ажиллагаа болон мэдээллийн дэмжлэгээ өргөжүүлсэн байна. Тухайлбал, Москва Иранд хиймэл дагуулын зураг өгч, дрон технологийг сайжруулах чиглэлээр туршлага хуваалцаж, бүс нутаг дахь АНУ-ын хүчнийг онилоход нь тусалж байна гэжээ. Үүний зэрэгцээ Орос улс Украины эсрэг явуулж буй дайны туршлагаасаа ашиглаж байгаа аж.
Эх сурвалж: DW
