УИХ-ын гишүүн асан Б.Энх-Амгалан, Ерөнхийлөгчийн Тамгын газрын даргаар ажиллаж байсан З.Энхболд нарт холбогдох хэргийн анхан шатны шүүх хурал 2026 оны гуравдугаар сарын 23-нд болж, шүүхээс хурлыг дөрөвдүгээр сарын 13-ны 10:00 цаг хүртэл хойшлуулах шийдвэр гаргажээ.
Тус хэргийг нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүх өмнө нь гурван өдөр дараалан хэлэлцсэн ч нэмэлт мөрдөн шалгах ажиллагаа шаардлагатай гэж үзэн, 60 хоногоор завсарлуулж байв.
Сануулахад, З.Энхболд болон Б.Энх-Амгалан нарыг албан тушаалаа урвуулан ашиглаж, бусдад давуу байдал олгосон хэрэгт хамтран оролцсон гэж үзэн, анхан шатны шүүхээс таван жилийн хугацаанд нийтийн албанд ажиллах эрхийг нь хасч, 40 сая төгрөгөөр торгосон. Гэвч давж заалдах шатны шүүх уг шийдвэрийг хүчингүй болгож, хэргийг дахин хэлэлцүүлэхээр буцаасан байна.
Үүний дараа анхан шатны шүүхээс З.Энхболдыг цагаатгаж, харин Б.Энх-Амгаланд хоёр жилийн хорих ял оноосон. Харин давж заалдах шатны шүүх хэргийг дахин хэлэлцээд, дээрх шийдвэрийг мөн хүчингүй болгож, дахин анхан шатны шүүхээр хэлэлцүүлэхээр болсон юм.
