Монгол Улсын Ерөнхий сайд асан, УИХ-ын гишүүн Л.Оюун-Эрдэнэ нь Хууль зүй, дотоод хэргийн сайд Б.Энхбаяртай холбоотой байж болзошгүй авлигын асуудлыг шалгуулахаар 2026 оны гуравдугаар сарын 23-ны өдөр Авлигатай тэмцэх газарт хүсэлт гаргасан талаар мэдээллээ.
Тэрбээр “Лхагвын тойм” нэвтрүүлэгт оролцох үеэрээ Б.Энхбаярыг “Бодь” компанитай холбоотойгоор хандив нэрээр 500 мянган ам.доллар авсан байж болзошгүй хэмээн мэдэгдэж байсан бөгөөд уг асуудлыг шалгуулахаа олон нийтэд амалсан. Энэ амлалтаа биелүүлэх зорилгоор ийнхүү АТГ-т хандсан байна.
Л.Оюун-Эрдэнэ “Миний ирсэн гол зорилго бол тодорхой асуудлыг бодит баримтад тулгуурлан тавих явдал. Нэг асуудлыг хөндөхөд өөр тийш нь чиглүүлэх оролдлого гарч байгаа тул асуудлыг төвлөрч, үнэн зөвөөр ярих нь зүйтэй” хэмээн онцлов.
Тэрбээр нийт 894 хуудас материалыг АТГ-т хүргүүлж буй бөгөөд үүнийг дөрвөн хэсэгт хуваажээ. Үүнд:
- “Бодь”-той холбоотой оффтейк гэрээ,
- нүүрсний сонсголтой холбоотой асуудлууд,
- Б.Энхбаярт холбогдох байж болзошгүй авлигын шинжтэй асуудлууд,
- бусад холбогдох баримт, мэдээлэл багтсан байна.
Мөн 2022 оны аравдугаар сарын 26-нд Монгол Улсын валютын нөөц 2.7 тэрбум ам.доллар хүртэл буурсан нь “Эрдэнэс Тавантолгой” ХК-аас экспортолж буй нүүрсний ихэнхийг “Бодь”-той холбоотой оффтейк гэрээгээр урьдчилан борлуулсантай холбоотой байж болзошгүй гэж тайлбарлав. Өөрөөр хэлбэл, нүүрс экспортлогдож байсан ч валютын орлого бодитоор орж ирээгүй нөхцөл үүссэн байна.
Үүний дараа Засгийн газраас холбогдох арга хэмжээ авч, нүүрсний асуудлыг шалгах түр хороо байгуулсан. Анх уг хороог УИХ-ын гишүүн Г.Ганболд ахалж байсан ч үйл ажиллагаа доголдсон гэж үзэн шинэчилж, Б.Энхбаяраар ахлуулахаар шийдвэрлэжээ. Тэрбээр өмнө нь Хөгжлийн банкны сонсгол зохион байгуулсан туршлагад нь үндэслэн дэмжсэнээ дурдсан байна.
Гэвч нүүрсний сонсголын явцад оффтейк гэрээ болон валютын нөөцтэй холбоотой асуудлууд хангалттай хөндөгдөөгүй, Б.Энхбаярын байр суурь явцын дунд өөрчлөгдсөн гэж Л.Оюун-Эрдэнэ үзэж байгаагаа илэрхийлэв.
Түүнчлэн тэрбээр Б.Энхбаяр “Бодь Интернэшнл” ХХК-ийн удирдлагатай уулзах үеэрээ нийт 1.3 сая ам.долларыг бэлнээр авсан байж болзошгүй тухай мэдээлэл байгаа бөгөөд энэ талаар гэрчийн мэдүүлэг, баримтыг АТГ-т өгч буйгаа мэдэгдсэн.
Мөн ХЗДХ-ийн дэд сайд Д.Мөнх-Эрдэнэтэй холбоотой асуудлыг дурдсан. Түүний хувьд өмнө нь Голомт банканд хуулийн зөвлөхөөр ажиллаж байсан. Зарим компанийн хүрээнд “Тавантолгой төмөр зам” компаниас зөвлөх үйлчилгээний нэрээр их хэмжээний санхүүжилт авсан байж болзошгүй талаар мэдээлэл бий гэжээ.
Цаашлаад Д.Мөнх-Эрдэнэ нь Б.Энхбаяртай ойрын харилцаатай нь томилгооны шийдвэрүүдтэй холбоотой байж болзошгүй, улмаар хууль зүйн шийдвэр гаргалтад нөлөөлсөн байх магадлалтай гэж хардаж буйгаа илэрхийлсэн.
Мөн албан тушаалд очсоноос хойш зарим гэрээ, цахим мэдээлэлд өөрчлөлт оруулах, устгах оролдлого хийсэн байж болзошгүй, түүнчлэн өмнөх холбоотой компаниудаас хувь эзэмшлээ татгалзах, намтар дахь мэдээллээ өөрчлөх зэрэг үйлдлүүд хийсэн гэх мэдээлэл байгаа аж.
Иймд уг асуудлыг яаралтай шалгаж, шаардлагатай тохиолдолд албан тушаалаас нь түдгэлзүүлэн мөрдөн шалгах нь зүйтэй гэж үзэж байгаагаа илэрхийлэв. Түүнчлэн “Бодь Интернэшнл” ХХК-ийн оффтейк гэрээний төсөв анх 600 сая ам.доллараас эхэлж, 1.3 тэрбум ам.доллар хүртэл өссөн нь дээрх нөхцөл байдалтай холбоотой байж болзошгүй гэлээ.
