Литвад Германы “Modern Talking” хамтлагийн гишүүн асан Дитер Боленийн арваннэгдүгээр сарын 20-нд Клайпедад, 21-нд Каунаст хийхээр төлөвлөж байсан тоглолтуудыг цуцалжээ.
Долоо хоногийн эхээр тоглолтуудынхаа зарыг түгээсэн ч гуравдугаар сарын 20-ны баасан гариг гэхэд арга хэмжээ болох газрууд болон тасалбар борлуулах сайтуудаас мэдээлэл нь устсан талаар Литвийн үндэсний телевиз, радиогоор мэдээлсэн байна.
Каунас хотын “Жальгирис Арена”-гийн арга хэмжээ хариуцсан албаны дарга Мантас Ведриккас “Бид зохион байгуулагчидтай зөвлөлдөөд, ийм төрлийн арга хэмжээг манай аренад зохион байгуулах ёсгүй гэж хамтран шийдсэн” гэж хэлжээ.
Тоглолтыг албан ёсоор цуцалсан шалтгааны талаар мэдээлээгүй ч энэ нь Болены олон нийтийн өмнө хийсэн мэдэгдлүүдтэй холбоотой байж магадгүй гэж Литвийн үндэсний телевиз, радио бичсэн байна.
Тэрбээр нэгэн ярилцлагадаа “Герман улс Оростой харилцаагаа ойртуулах ёстой” гэж үзэж буйгаа илэрхийлсэн байна. Тухайлбал тэр “Орос, Герман хоёр үнэндээ мөрөөдлийн баг байсан. Бид хямд эрчим хүчтэй байсан учраас бүх зүйл маш сайн явж байсан. Эдийн засгийн хувьд нэг нь нөгөөдөө хэрэгтэй зүйлтэй. Яг л Modern Talking шиг. Гэвч ёс суртахууны шалтгаанаар үүнээс татгалзсан” гэж хэлжээ.
Мөн гурван жилийн өмнө тэрбээр ОХУ-ын Украин руу хийсэн бүрэн хэмжээний довтолгоотой холбоотойгоор барууны орнуудын тавьсан хориг арга хэмжээг шүүмжилж, Владимир Путинтэй яриа хэлэлцээ хийхийг уриалж байсан аж.
Саяхан тэрбээр “Украин Оросын эсрэг ялалт байгуулах ямар ч боломжгүй” гэж мэдэгдсэн байна. Хэдийгээр Болен Оросын Украинд хийж буй дайныг буруушаадаг гэж удаа дараа хэлж байсан ч Украинд зэвсэг нийлүүлэхийг эсэргүүцэж, “танкаар дэлхийг дайнаас чөлөөлж чадахгүй” гэж үздэгээ ч илэрхийлжээ.
Түүний эдгээр мэдэгдлийг Германы олон улс төрчид, нийгмийн зүтгэлтнүүд шүүмжилсэн бол баруун жигүүрийн популист нам болох Alternative für Deutschland түүнийг дэмжсэн байна.
Эх сурвалж: DW
