Гуравдугаар сарын 20-нд Олон улсын аз жаргалын өдөр тохиодог. Энэ өдрийг тохиолдуулан хоёр судалгааны байгууллага олон улсын аз жаргалын түвшний судалгааны үр дүнгээ нийтэлжээ. Оксфордын их сургуулийн сайн сайхны судалгааны төв “Дэлхийн аз жаргалын тайлан” (The World Happiness Report)-гаа гаргасан бол Ipsos маркетинг, судалгааны компани мөн дэлхийн янз бүрийн улс орнуудын аз жаргалын түвшний жил тутмын судалгааг хийсэн байна.
Оксфордын их сургуулийн үнэлгээгээр дэлхийн хамгийн аз жаргалтай улс
Оксфордын судлаачид Финландыг дэлхийн хамгийн аз жаргалтай орноор дараалан 9 дэх жилдээ нэрлэлээ. Скандинавын бусад орнууд ч мөн өндөр байр эзэлжээ. Исланд болон Дани эхний гурван байрт багтсан бол Швед болон Норвеги тус тус тав, зургадугаар байранд оржээ.
Эрдэмтдийн үзэж байгаагаар, скандинавын хүмүүсийн сэтгэлгээ, нийгмийн халамжийн тогтолцоо нь хүн амын сайн сайхан байдалд чухал нөлөө үзүүлдэг байна.
Ipsos-ийн судалгаа: Германчуудыг юу аз жаргалтай болгодог вэ?
Ipsos компанийн судалгаагаар Германд оролцогчдын 72 гаруй хувь нь өөрсдийгөө аз жаргалтай гэж үзжээ. Энэ үзүүлэлт өмнөх жилтэй харьцуулахад 8 хувиар өссөн бөгөөд дэлхийн жагсаалтад таван байр ахисан байна. Оксфордын тайланд ч мөн Герман улс 22-р байрнаас 17-р байран руу дэвшжээ.
Ipsos-ийн судлаачид аз жаргалтай хүмүүсийн дунд өндөр орлоготой ахимаг насныхан илүү давамгай байгааг онцолжээ. Энэ хандлага дэлхий даяар ажиглагддаг.
Германчуудын аз жаргалд нөлөөлдөг гол хүчин зүйлс:
Оролцогчдын 40 хувь нь өөрийгөө үнэлэх мэдрэмж, хайр хүндлэл хамгийн чухал гэж үзсэн бол 35 хувь нь гэр бүл, хүүхдүүдийг онцолжээ. Мөн сэтгэцийн болон биеийн эрүүл мэнд, санхүүгийн байдал, орон сууцны нөхцөл чухал нөлөөтэй гэж дурдсан байна. Харин улс орны эдийн засаг, улс төрийн нөхцөл байдал, шашин, нийгмийн сүлжээ нь аз жаргалд харьцангуй бага нөлөөтэй гэж үзсэн байна.
Бусад улс орнуудын аз жаргалын байдал
Дэлхийн 29 орны оролцогчдын 74 хувь нь өөрсдийгөө аз жаргалтай гэж хариулжээ. Нэгдүгээр байранд Индонез орсон бөгөөд тус улсын иргэдийн 86 хувь нь өөрсдийгөө аз жаргалтай гэж үзсэн байна. Тэднээс арай бага үзүүлэлттэйгээр Нидерланд болон Мексик оржээ.
Герман улс нийт 29 орны дунд 21-р байрт бичигдсэн байна. Хамгийн бага үзүүлэлттэй орнуудад Унгар (54%), Өмнөд Солонгос (57%), Турк (59%) орсон байна. Турк улс 2011 оны судалгаатай харьцуулахад хамгийн их бууралтыг үзүүлсэн бөгөөд аз жаргалтай хүмүүсийн хувь 30 пунктээр буурчээ.
Эх сурвалж: DW
