Дэлхийн усны өдрийг угтан “Ус ба тэгш эрх” сэдвийн хүрээнд өнөөдөр (2026.03.19) уулзалт, хэлэлцүүлэг зохион байгууллаа. Арга хэмжээг Байгаль орчин, уур амьсгалын өөрчлөлтийн яам, Засгийн газрын хэрэгжүүлэгч агентлаг Усны газар, НҮБ-ын Хүүхдийн сан (UNICEF)-тай хамтран зохион байгуулж, төрийн байгууллага, олон улсын байгууллага, хувийн хэвшил, судлаачдын төлөөлөл өргөнөөр оролцов.
Хэлэлцүүлэг нь Монгол Улсын усны нөөцийн жигд хуваарилалтыг хангах, уур амьсгалын өөрчлөлтөд дасан зохицсон менежментийг хэрэгжүүлэх, экосистемийн тэнцвэрт байдлыг хадгалах бодлогын хэрэгжилтийг олон нийтэд таниулахад чиглэв. Мөн ус ашиглалтын тэгш бус байдлыг бууруулах, усны нөөцийг хамгаалах, зүй зохистой ашиглах хандлагыг төлөвшүүлэхэд онцгой анхаарал хандууллаа.
Арга хэмжээний нээлтэд Байгаль орчин, уур амьсгалын өөрчлөлтийн сайд Б.Батбаатар, НҮБ-ын Хүүхдийн сангийн суурин төлөөлөгч Беате Дастел, Улсын Их Хурлын гишүүн, Усны тухай хуулийн ажлын хэсгийн ахлагч Л.Мөнхбаясгалан нар оролцож, усны салбарын бодлого, эрх зүйн орчны талаар байр сууриа илэрхийлэв.
Хэлэлцүүлгийн үеэр Монгол Улсын усны нөөцийн өнөөгийн нөхцөл байдал, ус хангамж, ариун цэвэр, эрүүл ахуйн салбарын бодлого, боловсролын байгууллагын усны хүртээмж, олон улсын байгууллагуудын хэрэгжүүлж буй хөтөлбөр, төслүүдийг танилцууллаа. Тухайлбал, НҮБ-ын Хүүхдийн сан, Дэлхийн эрүүл мэндийн байгууллага, “The Nature Conservancу” байгууллагаас хэрэгжүүлж буй ус хамгааллын санаачилгуудыг онцолсон юм.
ЗГХА Усны газраас 2025 оны нийт ашигласан усны хэмжээг 682 сая м3 болсныг зарлаж, цэвэрлэсэн хаягдал усны хэмжээ 252 сая м3 болсныг албан ёсоор мэдэгдлээ. Мөн Усны нөөц ашигласны төлбөр 86 тэрбум, ус бохирдуулсны төлбөрт 7.5 тэрбум төгрөг улсын төсөвт төвлөрч орлогын хэмжээ нэмэгдсэнийг зарлалаа. 2025 он Усны элч Голомт банк, MCS coca cola компаниуд усны талаар хийсэн сайн туршлагуудаа танилцуулав.
Мөн шинээр Булган гол дээр өөрийн хөрөнгөөр хөв цөөрам байгуулсан, Хар ус нуурыг сайн дураараа өдөр бүр цэвэрлэдэг, Эгийн голын цэвэрлэх ажиллагааг зохион байгуулсан 3 иргэнийг Усны элчээр тодруулж, сайн үйлсийг олонд түгээв. Үйлдвэрүүдээс Монос хүнс компань Усны элчээр тодорч, 30 мянган м3-ээс доошгүй усан байгуулах үүрэг амлалт авлаа.
Улсын Их Хурлын гишүүн Л.Мөнхбаягалан Усны тухай хуулийг боловсруулах, ажлын хэсгийн ахлагчийн хувиар, Монгол Улсын усны элч Төрийн Түшээгээр тодорч, Усны чиглэлээр манлайлал үзүүлэн ажиллахаа илэрхийлэв.
