Иран “Улсын аюулгүй байдлын өндөр албан тушаалтан Али Ларижани болон бусад чухал хүмүүсийг Израиль хөнөөсөн нь үйл ажиллагаанд саад болохгүй, оронд нь шинэ хүмүүсийг шуурхай томилсон” гэж мэдэгджээ. Одоо Израиль Ливанд байрлах Ираны дэмжлэгтэй Хезболла бүлэглэлд цохилт өгч байгаа аж.
Ираны Гадаад хэргийн сайд Аббас Аракчи Аль Жазирад өгсөн ярилцлагадаа “АНУ болон Израиль Ираны тогтолцоог буруу ойлгож байна. Манай улс нэг хүний хамааралтай биш, тогтвортой системтэй” гэж хэлжээ. Тэрбээр мөн “Өндөр албан тушаалтнууд амиа алдсан ч төрийн үйл ажиллагаа доголдохгүй, хэвийн үргэлжилнэ” гэж онцолсон байна.
🚀 Тель-Авив руу пуужингаар довтлов
Иран улс Тель-Авивт кластер хошуут пуужингаар цохилт өгсөн гэж тус улсын төрийн телевиз мэдээлжээ. Энэ нь Ларижанийг хөнөөсөн аллагын хариу арга хэмжээ гэж мэдэгдсэн байна. Ираны Хувьсгалт гвардийн мэдэгдэлд “Khorramshahr-4”, “Qadr” төрлийн олон хошуут пуужин ашигласан талаар дурджээ.
Израилийн мэдээлснээр Тель-Авив орчмын хүн ам шигүү суурьшсан бүсэд цохилт өгсний улмаас хоёр хүн амиа алдаж, нийт хохирогчийн тоо 14-д хүрсэн байна. Израиль “Кластер хошуут пуужин агаарт задарч, олон жижиг бөмбөг тараадаг учраас бүгдийг нь нэг дор устгах боломжгүй” гэж мэдэгджээ.
⚔️ Дайн намжих шинжгүй байна
Ираны шинэ удирдагч Можтаба Хаменеи гал зогсоох саналыг хүлээн авахаас татгалзсан бөгөөд “АНУ, Израиль ялагдлаа хүлээн зөвшөөрч, нөхөн төлбөр төлөх хүртэл энх тайван ярих цаг биш” гэжээ.
🏙️ Ливанд Израилийн цохилт
Израилийн агаарын цохилтын улмаас Ливаны нийслэл Бейрут хотод доод тал нь зургаан хүн амиа алджээ. Хотын өмнөд хэсэгт хүчтэй дэлбэрэлтүүд болсон байна. Энэ нь Ливаныг дайнд улам гүн татан оруулж байгаа хэрэг аж.
⚓ АНУ Ираны эрэг орчимд цохилт өгчээ
АНУ Ормузын хоолойн ойролцоох Ираны байршлуудад “bunker buster” буюу гүн нэвтрэх бөмбөг ашиглан цохилт өгсөн байна. Ормузын хоолой нь дэлхийн нефтийн 20 хувь дамждаг стратегийн бүс юм. Ираны заналхийллээс болж нефтийн үнэ огцом өсч, дэлхийн эдийн засагт дарамт үүссэн.
🌍 Дэлхий даяарх нөлөө
Хүний эрхийн байгууллагын мэдээллээр Иранд ойролцоогоор 3000 хүн амиа алджээ. Персийн булангийн орнуудад 2000 гаруй пуужин, дроны халдлага болсон байна. Нислэгүүд цуцлагдаж, агаарын орон зай хаагдсан, нефтийн үнэ 45 хувиар өссөн. Дэлхий даяар инфляц, хүнсний хямрал нэмэгдэх эрсдэлтэй байгаа аж.
Дэлхийн Хүнсний Хөтөлбөр “Дайн үргэлжилвэл хэдэн арван сая хүн өлсгөлөнд нэрвэгдэх аюултай” гэж анхааруулжээ.
Эх сурвалж: REUTERS
