УИХ-ын Өргөдлийн байнгын хороо 2026 оны гуравдугаар сарын 17-нд хаврын ээлжит чуулганы анхны хуралдаанаа хийж, хүүхэд үе тэнгийн дээрэлхэлтэд өртөхөөс урьдчилан сэргийлэх, хамгаалах арга хэмжээний хэрэгжилтийн талаар холбогдох яамдын мэдээллийг сонслоо.
Хуралдаанаар Хүүхэд хамгааллын тухай хуульд заасан хүүхдийг үе тэнгийн дээрэлхэлтээс хамгаалах зохицуулалтын хэрэгжилтийг хэлэлцсэн бөгөөд Гэр бүл, хөдөлмөр, нийгмийн хамгаалал, Боловсрол, мөн Хууль зүй, дотоод хэргийн салбарын төлөөлөл мэдээлэл танилцуулсан юм.
Хуулийн дагуу “үе тэнгийн дээрэлхэлт” гэдэг нь нэг буюу хэд хэдэн хүүхэд өөр нэг буюу хэд хэдэн хүүхдийг бие махбод болон сэтгэл санааны хувьд гэмтээх, зовоох, ялгаварлан гадуурхах, айлган сүрдүүлэх зорилгоор санаатайгаар, удаа дараа биеэр, амаар эсвэл цахим орчинд түрэмгий үйлдэл гаргахыг хэлдэг.
108 утсанд 2300 гаруй дуудлага бүртгэгджээ
Гэр бүл, хөдөлмөр, нийгмийн хамгааллын яамнаас мэдээлснээр 2024 оноос 2026 оны гуравдугаар сарын 13-ныг хүртэл хугацаанд хүүхдийн тусламжийн 108 утсанд үе тэнгийн дээрэлхэлттэй холбоотой 2300 дуудлага бүртгэгдсэн байна. Үүнээс
- 214 тохиолдолд анхан шатны сэтгэл зүйн зөвлөгөө өгч,
- 2086 хүүхдэд хүүхэд хамгааллын үйлчилгээ үзүүлжээ.
Дээрэлхэлтэд өртсөн хүүхдүүдийн 24.6 хувь нь охид, 75.4 хувь нь хөвгүүд байгаа бөгөөд дийлэнх нь 11-14 насны хүүхдүүд байна. Мөн дээрэлхэлтийн 69.6 хувь нь сургуулийн орчинд үйлдэгдэж байгааг албаныхан онцоллоо.
Анхаарал татсан нэг асуудал нь хохирогчдын талаарх мэдээллийн 55.3 хувь нь Гэмтэл согог судлалын үндэсний төвөөс ирж байгаа аж. Өөрөөр хэлбэл, хүүхдүүд гэмтэл авч, эмнэлэгт хүргэгдсэний дараа л дээрэлхэлт илэрч байгаа нь урьдчилан сэргийлэх тогтолцоо хангалтгүй байгааг харуулж буй юм.
Урьдчилан сэргийлэх олон ажил хэрэгжүүлжээ
Сүүлийн жилүүдэд төрийн болон төрийн бус байгууллагууд хамтран үе тэнгийн дээрэлхэлт, цахим орчны дарамтаас урьдчилан сэргийлэх чиглэлээр олон арга хэмжээ хэрэгжүүлсэн байна. Тухайлбал “Найз байя”, “Чи ганцаараа биш”, “Нэгдүгээрт хүүхэд”, “Цахим орчинд эерэг байя”, “Миний цахим хэрэглээ”, “Дээрэлхэлт дэлгэрэх ёсгүй” зэрэг сургалт, нөлөөллийн 290 гаруй арга хэмжээг зохион байгуулжээ.
Эдгээрт давхардсан тоогоор 578 мянга гаруй хүүхэд, 168 мянга гаруй эцэг эх, асран хамгаалагч хамрагдсан байна.
Сургуулийн сэтгэлзүйчдийн тоо нэмэгдэв
Боловсролын яамны мэдээллээр, 2024-2025 оны хичээлийн жилд ерөнхий боловсролын сургуулиудад 421 сэтгэлзүйч ажиллаж байсан бол энэ хичээлийн жилд 799 болж, 378 сургууль шинээр сэтгэлзүйчтэй болжээ.Мөн
- 978 нийгмийн ажилтан сургуульд ажиллаж байгаа бөгөөд
- 2024-2025 оны хичээлийн жилд 748,378 сурагч эрсдэлийн үнэлгээнд хамрагдсанаас 58,055 нь дунд болон өндөр эрсдэлтэй,
- 16,117 сурагч үе тэнгийн дээрэлхэлтэд өртсөн гэж үнэлэгдсэн байна. Түүнчлэн
- 5165 сурагчийг бусад хамгааллын үйлчилгээ рүү зуучилж,
- 47,541 хүүхдэд нөхөн сэргээх үйлчилгээ үзүүлжээ.
Хүүхдийг цахим дарамтаас хамгаалах хууль боловсруулж байна
Албаныхан нийгмийн сүлжээнд хүүхдийн оролцоог зохицуулах тухай хуулийн төслийг боловсруулж байгааг танилцуулсан. Энэ хууль батлагдсанаар хүүхдийг цахим дарамт, заналхийлэл, эрсдэлт орчноос урьдчилан сэргийлэх, хамгаалах эрх зүйн зохицуулалт бүрдэх юм.
Мөн сургуулийн орчинд хүүхэд хамгааллын “аюулгүйн сүлжээ” бий болгох, 108 утсанд ирсэн дуудлагыг сургуулийн нийгмийн ажилтан, боловсролын салбарын системтэй шууд холбох, эцэг эхийн оролцоог нэмэгдүүлэх зэрэг арга хэмжээг хэрэгжүүлэхээр төлөвлөж байгааг танилцууллаа.
Хэлэлцүүлгийн үеэр УИХ-ын гишүүд үе тэнгийн дээрэлхэлтийн шалтгаан, үр дагавар, урьдчилан сэргийлэх бодлого, сургуулийн сэтгэлзүйчдийн хүрэлцээ, цахим орчны нөлөө зэрэг асуудлаар асуулт тавьж, бодлогын уялдаа, хариуцлагыг сайжруулах шаардлагатайг онцлов.
