Ираны Үндэсний аюулгүй байдлын дээд зөвлөлийн нарийн бичгийн дарга Али Ларижани АНУ-ын Ерөнхийлөгч Дональд Трампад хандан “Иран улс өөрийнх нь эсрэг хийсэн түрэмгий үйлдлийн төлөө АНУ-д хариуцлага хүлээлгэж, төлөөсийг нь төлүүлэх болно” гэж мэдэгджээ.
Ларижани X (хуучнаар Twitter) сүлжээнд “Дайн эхлүүлэх амархан. Харин хэдхэн жиргээгээр дуусгах боломжгүй. Алдаагаа хүлээн зөвшөөрч, түүнийхээ төлөө хариуцлага хүлээх хүртэл бид та нарыг зүгээр орхихгүй” гэж онцолжээ.
Ираны ГХЯ: Иранд өрнөж буй мөргөлдөөн НҮБ-ын “төгсгөлийн эхлэл”
Ираны Гадаад харилцааны яамны төлөөлөгчийн үзэж байгаагаар, тус улсад өрнөж буй зэвсэгт мөргөлдөөн нь НҮБ-ын олон улсын тавцан дахь байр суурийн “төгсгөлийн эхлэл” болж магадгүй аж. Энэ талаар Ираны ГХЯ-ны албан ёсны төлөөлөгч Эсмаил Багаи мэдэгдсэн байна.
Тэрбээр “Ираны эсрэг явуулж буй дайн нь НҮБ-ын дэлхийн тавцан дахь төгсгөлийн эхлэл болно. Учир нь, энэ байгууллага манай улсын эсрэг хийж буй түрэмгийллийн асуудлаар зөв байр суурь баримталж чадсангүй” гэжээ. Түүний хэлснийг Иракийн Al-Ahad телевизийн суваг иш татан мэдээлсэн байна.
Эх сурвалж: TASS, REUTERS
