Ардчилсан Намаас 2026 оны гуравдугаар сарын 12-ны пүрэв гаргийн 11:00 цагт Төрийн ордны III давхарт “4:11 мэдээллийн цаг” хэвлэлийн бага хурлаа зохион байгуулахаар хэвлэл мэдээллийн байгууллага, сэтгүүлчдийг урив.
Энэ удаагийн хэвлэлийн хурлаар улс төрийн цаг үеийн асуудлаар Ардчилсан Намын дарга О.Цогтгэрэл мэдээлэл хийхийн зэрэгцээ гишүүдийн шинэчилсэн бүртгэлийн аяны үр дүнгийн явцын талаар танилцуулахаар төлөвлөжээ.
Тус нам “Нээлттэй, цэгцтэй-Ардчилсан Нам” үндэсний аяны хүрээнд Намын гишүүддээ “Ардчиллын гэрэгэ” олгох хүндэтгэлийн арга хэмжээг Ардчилсан Намаас цувралаар зохион байгуулж буй.
Энэ хүрээнд Ардчилсан Намын дарга, УИХ дахь Ардчилсан Намын бүлгийн дарга О.Цогтгэрэл /2026.03.10/ ардчиллын үнэт зүйлсийг төлөвшүүлэхэд үнэтэй хувь нэмэр оруулсан Ардчилсан Намын анхдагч гишүүд болох П.Цагаан, Л.Доржсүрэн, Д.Дорлигжав, Ш.Оргил, Б.Алтан-Очир, С.Майнбаяр, И.Нарантуяа, Л.Энхтөр, Д.Басандорж, Х.Ганболд нарт “Ардчиллын гэрэгэ”-г гардуулжээ.
Энэ үеэр АН-ын дарга “Ардчилсан Намын шинэчлэл нь зөвхөн дүрэм журамд өөрчлөлт хийх төдий асуудал биш, харин намын үзэл баримтлал, үнэт зүйл, үйл ажиллагааны хандлагыг илүү боловсронгуй түвшинд хүргэх цогц үйл явц аж. Энэ шинэчлэл нь намын дотоод ардчиллыг бэхжүүлж, шийдвэр гаргах үйл явцыг ил тод, хариуцлагатай болгоход чиглэнэ.
Ардчилсан Нам цаашид бодлого суурьтай, судалгаанд тулгуурласан, гишүүн төвтэй нам болно. Эцсийн дүндээ энэхүү шинэчлэл нь намыг илүү хариуцлагатай, бодлогын өндөр чадамжтай, ард түмний итгэлийг даах чадвартай улс төрийн хүчин болгоход чиглэнэ” гэжээ.
Уулзалтын үеэр ардчиллын ахмад гишүүд улс төр, эдийн засаг, татвар, хууль эрх зүйн орчин зэрэг олон чухал асуудлаар санал бодлоо илэрхийлжээ.
