Роберт Фицо тэргүүтэй Словакийн засгийн газар Европын Холбооноос Украинд олгохоор төлөвлөсөн 90 тэрбум еврогийн зээлийг хаах асуудал дээр Унгарыг орлож магадгүй гэж мэдэгджээ. Хэрэв Унгарын Ерөнхий сайд Виктор Орбаны нам парламентын сонгуульд ялагдвал Словак энэ “буухиаг үргэлжлүүлж” магадгүй гэж Фицо хэлсэн байна.
Тэрбээр гуравдугаар сарын 8-нд Facebook-т байршуулсан видео мэдэгдлээрээ дамжуулан “Би гэнэн биш. Украины Ерөнхийлөгч сүүлийн үед нефтийн нийлүүлэлтийг нэг юм уу, нэг хагас сарын дараа сэргээнэ гэж ярьж байна. Өөрөөр хэлбэл, Унгарын сонгуулийн дараа, тэнд сөрөг хүчин ялна гэж найдаж байгаа хэрэг” гэж хэлжээ.
Фицогийн үзэж байгаагаар, энэ хугацаа өнгөрсний дараа “дорно зүгээс ирэх нефтийн боломж бүрмөсөн хаагдаж магадгүй” бөгөөд Унгарын оронд өөр улс энэ асуудлыг үргэлжлүүлж магадгүй аж. Тэрбээр Украинд олгох зээлийг хаахыг “нефтийн нийлүүлэлтийг сэргээх хууль ёсны арга хэрэгсэл” гэж тодорхойлсон байна.
Унгарт парламентын сонгууль болно
Унгарын парламентын сонгууль дөрөвдүгээр сарын 12-нд товлогдсон. Сүүлийн санал асуулгаар сөрөг хүчний Тиса нам, түүний удирдагч Петер Мадьярын тэргүүлсэн эвсэл Орбаны Фидесз намаас ойролцоогоор 10 хувиар илүү дэмжлэг авч байгаа аж.
Фицо “Дружба” хоолойг засварлах санал тавина
Словакийн Ерөнхий сайд Фицо гуравдугаар сарын 10-нд Европын Комиссын тэргүүн Урсула фон дер Ляйентэй уулзахдаа “Дружба” (Druzhba pipeline) нефтийн хоолойн ажиллагааг сэргээх асуудлыг хөндөнө гэж мэдэгджээ.
Тэрбээр шаардлагатай бол Унгарт хоолойг засварлахад туслах санал тавих бөгөөд “хэрэв нэг боолт чангалах шаардлагатай бол ч” Словаки туслахад бэлэн гэж хэлсэн байна.
Мөн Фицо Украины Ерөнхийлөгч Владимир Зеленский өмнө нь Орбаны холбоо барих мэдээллийг Украины зэвсэгт хүчинд өгч болно гэж хэлсэн талаар дурсаад, энэ нь “бүх улаан шугамыг давсан” гэж мэдэгджээ.
Унгар ЕХ-ны тусламжийг хаасан
Унгар хоёрдугаар сарын 21-нд Европын Холбооноос Украинд олгох тусламжийн багцыг хааж, ОХУ-ын эсрэг шинэ хориг арга хэмжээг батлахыг зөвшөөрөөгүй байна. Эдгээрийг Орос Украинд довтолсны дөрөв дэх жилийн ойгоор батлахаар төлөвлөж байжээ.
Мөн Будапешт Украинд нийлүүлдэг дизель түлшний нийлүүлэлтийг түр зогсоосон байна. Үүний дараа Фицо “Украин нефтийн нийлүүлэлтийг сэргээхгүй бол Украинд өгч буй онцгой байдлын цахилгаан нийлүүлэлтийг зогсооно” гэж анхааруулжээ.
Орбан гуравдугаар сарын 3-нд Европын Комиссоос Украинд нөлөөлж, “Дружба” хоолойгоор нефтийн транзитыг сэргээхийг шаардаж байсан. Тэрбээр энэ сарын 5-нд Украинд ямар ч буулт хийхгүй бөгөөд “Дружба” хоолойн “Украины хаалт”-ыг хүчээр дуусгана гэж мэдэгдсэн байна.
Зеленский Фицог Киевт урив
Владимир Зеленский болон Роберт Фицо нар хоёрдугаар сарын 27-нд утсаар ярилцсан бөгөөд Зеленский Словакийн Ерөнхий сайдыг Киевт айлчлан, бүх асуудлыг хэлэлцэхийг урьсан байна. Гэвч Фицо энэ урилгад одоогоор хариу өгөөгүй байгаа аж.
Нефтийн нийлүүлэлт яагаад зогсов
Украины Гадаад хэргийн сайд Андрий Сибиха “Нефтийн нийлүүлэлт зогссон шалтгаан нь Оросын довтолгооны үеэр Украины нутаг дахь “Дружба” хоолойн хэсэг гэмтсэн явдал” гэж тайлбарлажээ.
Киевийн мэдээлснээр, Оросын цохилтын улмаас баруун Украинд байрлах насосны станцууд эвдэрсэн байна. Харин Будапешт үүнийг үгүйсгэж, Украин өөрөө хоолойн тэр хэсгийн цахилгаан хангамжийг унтраасан гэж мэдэгджээ.
Reuters: Украины нефтийн экспорт ч зогссон
Reuters агентлагийн мэдээлснээр, “Дружба” хоолойн асуудлаас болж зөвхөн Оросын нефтийн нийлүүлэлт бус, Украины түүхий нефтийн экспорт ч зогссон байна.
Өмнө нь Киев энэ хоолойг ашиглан нефтийг Европын Холбоо руу тээвэрлэдэг байсан аж. Нийлүүлэлт зогссоноор Украин төсвийн алдагдлаа нөхөхөд шаардлагатай орлогын эх үүсвэрээ алдах эрсдэлтэй болжээ.
Словаки нефтийн салбарт онц байдал зарлав
Словакийн засгийн газар хоёрдугаар сарын дундуур “Дружба” хоолойгоор нефть ирэхээ больсонтой холбоотойгоор нефтийн салбарт онц байдал зарласан байна.
Тус улс өөрийн стратегийн нөөцөөс 250 мянган тонн хүртэл нефтийг Братислав дахь Словнафт нефть боловсруулах үйлдвэрт нийлүүлэхээр болжээ.
Харин үйлдвэр энэ нефтийн үнэ цэнтэй тэнцэх хэмжээний санхүүгийн баталгаа гаргах ёстой бөгөөд авсан нефтийг есдүгээр сар хүртэл улсад буцаан өгөх үүрэгтэй аж.
Эх сурвалж: DW
