АНУ-ын Ерөнхийлөгч Доналд Трампын хэлснээр, Иран дахь дайн өмнө төлөвлөснөөс илүү хурдан дуусах боломжтой болжээ. Тэрбээр гуравдугаар сарын 9-ний даваа гарагт CBS News телевизэд утаар ярилцлага өгөхдөө “Миний бодлоор дайн бараг дууссан. Тэдэнд флот байхгүй, холбоо байхгүй, агаарын хүчин ч байхгүй болсон” гэж мэдэгджээ.
Гэсэн хэдий ч Трамп АНУ болон Израил “хангалттай ялалт байгуулж амжаагүй байна” гэж нэмж хэлсэн байна. Дараа нь Флорида мужид хийсэн хэвлэлийн бага хурал дээр нэг сэтгүүлчийн “Иран дахь дайн энэ долоо хоногт дуусах уу?” гэсэн асуултад Трамп “Үгүй” гэж хариулжээ.
Тэрбээр зөвхөн “Маш удахгүй дуусна” гэж хэлсэн бөгөөд тодорхой хугацаа дурдаагүй байна. Мөн Трамп “Дайны хамгийн аюултай үе гурав хоногийн өмнө өнгөрсөн” гэж мэдэгджээ.
Трамп “Ираны зэвсэг бараг бүрэн устсан” гэж мэдэгдэв
CBS-д өгсөн ярилцлагадаа Трамп “Ираны пуужингийн ихэнхийг устгаж, дрон болон тэдгээрийг үйлдвэрлэдэг үйлдвэрүүдийг ажиллагаагүй болгосон” гэж хэлжээ. Тэр “Нөхцөл байдлыг харвал тэдэнд бараг юу ч үлдээгүй. Цэргийн талаас нь харвал тэдэнд юу ч үлдээгүй” гэж онцолсон байна.
Трамп: Ормузын хоолой нээлттэй байна
АНУ-ын Ерөнхийлөгчийн хэлснээр, олон улсын усан тээвэрт маш чухал Ормузын хоолой (Strait of Hormuz) одоогоор нээлттэй байгаа бөгөөд усан тээвэр хэвийн үргэлжилж байгаа аж.
Хэдхэн хоногийн өмнө Тегеран энэ хоолойг бүрэн хяналтдаа авсан гэж мэдэгдэж байсан. Гэвч Трамп “АНУ уг хоолойг өөрийн хяналтад авах боломжийг ч бодож үзэж байна” гэж хэлжээ.
Үүний зэрэгцээ Ираны Хувьсгалт гвард (Islamic Revolutionary Guard Corps) Ормузын хоолойгоор чөлөөтэй зорчих эрх авахыг хүссэн Арабын болон Европын орнуудаас АНУ болон Израилийн Элчин сайд нарыг хөөж гаргах шаардлага тавьсан байна.
Трамп: Ираны шинэ удирдагчид сэтгэл дундуур байна
Трамп Ираны шинэ дээд удирдагчаар томилогдсон Можтаба Хаменеин талаар “Сэтгэл дундуур байна” гэж мэдэгджээ. Тэрбээр түүнийг “хуучин асуудлуудын үргэлжлэл” гэж тодорхойлсон байна.
Өмнө нь Трамп Ираны шинэ удирдагч Вашингтоны зөвшөөрлийг авах ёстой, эс бөгөөс “урт хугацаанд тогтож чадахгүй” гэж мэдэгдэж байв.
Нефтийн үнэ огцом унав
Иран дахь дайн удахгүй дуусч магадгүй гэсэн Трампын мэдэгдлийн дараа дэлхийн нефтийн үнэ огцом буурсан байна. Брент маркийн түүхий нефтийн үнэ гуравдугаар сарын 9-ний орой баррель нь 89.20 ам.доллар болж буурчээ. Харин үүнээс нэг өдрийн өмнө үнэ нь 120 ам.доллар давсан байна.
Трамп нефтийн үнийг бууруулахын тулд зарим нефтийн салбартай холбоотой хориг арга хэмжээг түр хугацаанд цуцлах талаар бодож байгаа талаараа Флоридад сэтгүүлчдэд хэлжээ. Гэхдээ энэ алхам ямар улсуудад хамаарах талаар тодорхой мэдээлэл өгөөгүй байна.
Үүнээс гурван хоногийн өмнө АНУ-ын Сангийн сайд Скотт Бессент Вашингтон танкеруудад ачигдсан байгаа Оросын нефтьтэй холбоотой хоригийг зөөлрүүлэх боломжийн талаар хэлэлцэж байгаа гэж мэдэгджээ.
Мөн АНУ Энэтхэгийн нефть боловсруулах үйлдвэрүүдэд танкеруудад ачигдсан Оросын нефтийг 30 хоногийн хугацаанд худалдан авахыг зөвшөөрч, ингэснээр нефтийг дэлхийн зах зээлд үргэлжлэн нийлүүлэх боломж бүрдүүлжээ.
Путинтэй ярилцсан талаар
Флорида мужийн Дорал хотод болсон хэвлэлийн бага хурлын өмнөхөн Трамп ОХУ-ын Ерөнхийлөгч Владимир Путинтэй утсаар ярьсан байна. Тэрбээр энэ яриаг “эерэг яриа болсон” гэж сэтгүүлчдэд мэдэгджээ.
Дайны талаар өмнө нь хэлж байсан таамаг
АНУ болон Израиль Ираны эсрэг хоёрдугаар сарын 28-наас эхлэн цэргийн ажиллагаа явуулж эхэлсэн. Тухайн үед Трамп “Эпик уур хилэн” нэртэй уг ажиллагаа 4-5 долоо хоног үргэлжилж магадгүй гэж хэлж байв.
Эх сурвалж: DW
