ОХУ-ын Ерөнхийлөгч Владимир Путин АНУ-ын Ерөнхийлөгч Доналд Трамптай утсаар ярилцсан талаар Кремлийн туслах Юрий Ушаков сэтгүүлчдэд мэдээлжээ. Түүний хэлснээр, олон улсын нөхцөл байдлын талаар хэлэлцэхээр Америкийн Ерөнхийлөгч өөрөө яриаг эхлүүлсэн байна.
Ярианы гол сэдэв нь Ираны мөргөлдөөн болон Москва, Вашингтон, Киевийн хооронд болж буй гурван талт хэлэлцээний тухай байжээ. Эдгээр хэлэлцээ нь Украины мөргөлдөөнийг зохицуулах зорилготой юм.
Ушаковын хэлснээр, хоёр удирдагчийн яриа “ажил хэрэгч, нээлттэй, бүтээлч” уур амьсгалтай болсон бөгөөд цаашид тогтмол холбоотой байх сонирхлоо илэрхийлсэн байна. Тэдний утасны яриа ойролцоогоор нэг цаг орчим үргэлжилжээ.
АНУ-ын Ерөнхийлөгч Вашингтон Москва болон Киевийн хоорондох дайсагналцыг зогсоож, урт хугацааны шийдэлд хүрэхийг хүсэж буйгаа дахин нотолсон байна. Үүний хариуд Путин Трампын засаг захиргаанаас явуулж буй зуучлалын хүчин чармайлтад талархал илэрхийлжээ.
Мөн Путин Иранд өрнөж буй мөргөлдөөний талаар өөрийн байр суурийг илэрхийлж, өнгөрсөн долоо хоногт Персийн булангийн орнуудын удирдагчид болон Ираны Ерөнхийлөгч Масуд Пезешкиантай ярилцсан талаараа Трампад хэлсэн байна.
Трамп ч мөн тухайн нөхцөл байдлын талаар өөрийн үзэл бодлоо илэрхийлсэн бөгөөд энэ асуудлаар тэд “маш утга учиртай” хэлэлцсэн гэж Ушаков хэлжээ.
Дараа нь Трамп хэвлэлийн бага хурал дээр Путинтэй утсаар ярьсан талаараа хэлэхдээ “маш сайн яриа болсон” гэж тодорхойлж, тэд Ираны дайн болон Украинд үргэлжилж буй “төгсгөлгүй тэмцэл”-ийн тухай ярилцсан талаар хэлсэн байна.
Путин: Персийн булангийн газрын тосны үйлдвэрлэл хэдхэн долоо хоногийн дараа зогсож магадгүй
Путин мөн өдөр Ойрхи Дорнод дахь мөргөлдөөн үргэлжилвэл дэлхийн газрын тос, хий дамжуулах урсгалд ноцтой саад учруулж болзошгүйг анхааруулсан байна. Тэр “Ялангуяа Ормузын хоолой хаагдсантай холбоотой” гэж хэлжээ.
Түүний хэлснээр, энэ нөхцөл байдалд Персийн булангийн газрын тосны олборлолт зогсох эрсдэлтэй. Ингэснээр дэлхийн зах зээлд “шинэ үнийн бодит байдал” бий болж магадгүй аж.
Путин “Орос улс найдвартай эрчим хүч нийлүүлэгч хэвээр байх болно” гэж мэдэгдээд, “Москва өөрийн итгэлтэй түнш гэж үздэг улсуудад нефть, хийгээ үргэлжлүүлэн нийлүүлэх болно” гэж нэмж өгүүлсэн байна.
Москва АНУ болон Израилийн Иранд хийж буй бөмбөгдөлтийг “урьдчилан төлөвлөсөн, өдөөн хатгалгагүй түрэмгийлэл” хэмээн буруушаажээ.
Путин өөрөө уг ажиллагаанд нийтлэг дүгнэлт өгөөгүй ч Ираны дээд удирдагч Али Хаменеиг хөнөөснийг ёс суртахуун болон олон улсын эрх зүйг бүдүүлгээр зөрчсөн, ёс зүйгүй үйлдэл гэж тодорхойлсон байна.
Эх сурвалж: RT
