Иргэний Зориг Ногоон Нам (ИЗНН) өнөөдөр буюу 2026 оны гуравдугаар сарын 9-нд цаг үеийн асуудлаар хэвлэлийн бага хурал зохион байгуулж, намынхаа Онц их хурлын талаар мэдээлэв.
Тус намын Онц их хуралд 500 гаруй төлөөлөгч оролцож, хурлын үеэр намын шинэ даргаар Р.Батболдыг сонгосон талаар албан ёсоор мэдэгдлээ. Мөн тус намын зарим гишүүд одоогийн дарга хэмээн нэрлэгдэж буй Б.Батбаатарт хариуцлага тооцуулах шаардлагыг Засгийн газарт хүргүүлэхээр болсноо онцолсон байна.
Харин Б.Батбаатар энэ асуудалд хариу тайлбар өгөхдөө, өөрийг нь 2027 оны Ерөнхийлөгчийн сонгуульд нэр дэвшүүлэх нь зүйтэй гэж үзэж байгаагаа илэрхийлжээ. Тэрбээр УИХ-ын гишүүн Р.Батболдыг удаа дараа намын эсрэг үйл ажиллагаа явуулж, хууль бус хурал зохион байгуулсан гэж буруутгасан. Мөн ийм үйлдэлд оролцсон хүмүүст хариуцлага тооцох асуудлыг намын Дүрмийн хороо хэлэлцэж, шийдвэр гаргана гэж мэдэгджээ.
ИЗНН-ын нийслэлийн намын дарга М.Амартунгалаг энэ талаар тайлбарлахдаа “Манай намын дарга гэж нэрлэгдэж буй Б.Батбаатарыг 2025 оны тавдугаар сарын 1-ний өдөр Монгол Улсын Дээд шүүх-ийн 26 дугаар тогтоолоор намын даргаар бүртгэхээс татгалзсан. Өөрөөр хэлбэл, манай нам албан ёсоор бүртгэлтэй даргагүй байгаа гэсэн үг.
Улс төрийн намын тухай хууль хүчин төгөлдөр хэрэгжиж эхэлсэнтэй холбоотойгоор улс төрийн бүх нам дүрмээ шинэчилж, хуульд нийцүүлэн Дээд шүүхэд бүртгүүлэх ёстой байсан. Энэ хугацаа 2025 оны арванхоёрдугаар сарын 31-нд дууссан. Харин ИЗНН дүрмээ хуульд нийцүүлэхээр нийт дөрвөн удаа Дээд шүүхэд хандсан ч дөрвөн удаа буцаагдсан.
Тухайлбал, намын эрх мэдлийн хуваарилалт тэгш бус, удирдлагад хариуцлага тооцох тодорхой механизм тусгагдаагүй зэрэг нь хуульд нийцэхгүй гэж Дээд шүүхээс үзсэн. Алдаагаа засч, дүрмээ шинэчлэх шаардлагатай гэж зөвлөсөн боловч намын удирдлага дорвитой өөрчлөлт хийгээгүй.
Мөн манай нам 2023 онд Дээд шүүхэд бүртгүүлсэн дүрэм нь одоогийн Улс төрийн намын тухай хуульд нийцэхгүй байгаа. Иймээс хуульд нийцээгүй дүрмээр намын хурлыг зохион байгуулах боломжгүй болсон.
Түүнчлэн намын даргыг Дээд шүүх бүртгэхээс татгалзсан зэрэг нөхцөл байдлын улмаас намын Онц их хурлыг зохион байгуулах шаардлага үүссэн. Иймд намын анхан шатны байгууллагууд болон орон нутгийн төлөөлөгчид нэгдэн, тогтоол гаргаж, энэхүү хурлыг зохион байгуулсан” хэмээн мэдэгджээ.
