ОХУ гуравдугаар сарын 7-ны бямба гарагт шилжих шөнө Украинд дахин олон чиглэлээс өргөн цар хүрээтэй цохилт өгсөн байна.
Харьков хотын Киевский дүүрэгт баллистик пуужин туссаны улмаас дор хаяж 11 хүн амь үрэгдсэний дунд хоёр хүүхэд (нэг хүү, 13 настай охин) байсан гэж мэдээлжээ.
Энэ талаар Украины Онцгой байдлын алба, Харьков мужийн цэргийн захиргааны дарга Олег Синегубов, хотын дарга Игорь Терехов болон Украины ерөнхийлөгч Владимир Зеленский нар Telegram хуудсаараа дамжуулан мэдэгдсэн байна.
Аврагчид амиа алдсан хүмүүсийн цогцсыг таван давхар орон сууцны барилгын нуранги доороос гаргажээ.
Украины Онцгой байдлын албаны мэдээлснээр, аврах ажиллагаа 300 м² талбайд үргэлжилж, мина, тэсрэх бөмбөг илрүүлэх, аврах нохойтой баг, сэтгэл зүйчид ажиллаж байгаа аж.
Нуранги дор хүн үлдсэн байх магадлалтай бөгөөд уг довтолгооны үеэр дор хаяж 10 хүн шархадсан, тэдний дунд хоёр хүүхэд буй юм байна.
Чугуев хотод дрон тусжээ
Харьков мужийн Чугуев хотын дарга Галина Минаевагийн мэдээлснээр, дроны довтолгооны үеэр хотын төвд байрлах хувийн байшинд цохилтод өртсөн байна.
Урьдчилсан мэдээллээр, 2 хүн шархадсан, ойролцоох байшингуудын цонхнууд хагарсан бөгөөд бусад хохирлын талаарх мэдээллийг одоогоор шалгаж байгаа аж.
Днепропетровск мужид нэг хүн амиа алдав
Мужийн захиргааны дарга Александр Ганжа “Днепропетровск мужид гурван дүүрэг дрон болон их бууны нийт 20 орчим довтолгоонд өртсөн” гэж мэдээлжээ. Үүний улмаас дор хаяж нэг хүн амиа алдсан байна. Тухайлбал:
Никополь болон ойролцоох суурингууд цохилтод өртсөн бөгөөд нэг үйлдвэр, 20 орон сууц болон хувийн байшин эвдэрсэн, автомашин, аж ахуйн барилга, нарны хавтангууд гэмтжээ.
Мөн 48 настай эрэгтэй амиа алдсан, 69 настай эмэгтэй шархадсан аж.
Запорожьед нярай хүүхэд шархаджээ
Мужийн захиргааны дарга Иван Фёдоров “Запорожье хотод шөнийн довтолгооны үеэр нярай хүүхэд шархадсан” гэж мэдээлсэн байна.
Түүний хэлснээр, нэг өдрийн дотор Оросын тал 41 сууринд 760 удаагийн цохилт өгснөөс 19 нь агаарын цохилт, 4 нь олон пуужингийн системийн довтолгоо, 232 нь их бууны гал байсан бөгөөд мөн 550 төрлийн дрон ашигласан байна.
Үүний улмаас орон сууц, автомашин, дэд бүтцийн объектууд эвдэрч, нийт 28 удаагийн хохирлын мэдээлэл бүртгэгджээ.
Черновцы мужид хот цахилгаангүй болов
Новоднестровск хот (Черновицкий муж) шөнийн довтолгооны дараа цахилгаангүй болсон гэж мэдээлжээ. Үүнээс өмнө Украины Агаарын хүчнийхэн далавчит пуужингууд хотыг чиглэж байна гэж анхааруулсан аж.
Сумы хотод орон сууц цохилтод өртжээ
Гуравдугаар сарын 6-ны орой Сумы хотын цэргийн захиргааны дарга Сергей Кривошеенко дрон хотын төв дэх оффисын барилгад туссан. Ойролцоох орон сууц мөн цохилтод өртсөн” гэж мэдээлсэн байна. Аз болоход, хүний амь нас хохироогүй аж.
Одесса мужид дэд бүтцийн байгууламжууд руу довтолжээ
Оросын тал Одесса болон Одесса Областийн дэд бүтцийн объектуудыг онилон довтолжээ. Гал түймрийг унтраахад 80 аврагч, 20 техник оролцсон байна.
Довтолгооны бусад үр дагаврын талаар тухайн үед илүү дэлгэрэнгүй мэдээлэл өгөөгүй байна.
Эх сурвалж: DW
