Монгол Улсын Ерөнхий сайд Г.Занданшатар экспортын хэмжээг нэмэгдүүлэх зорилгоор ноос, ноолуурын салбарынхан болон банкны төлөөллүүдтэй өчигдөр уулзаж, салбарын хөгжил, санхүүгийн хүртээмжийн асуудлыг хэлэлцэв.
Уулзалтын үеэр тэрбээр зээлийн хүртээмжийг хэрхэн нэмэгдүүлэх талаар Монголбанк болон арилжааны банкуудын төлөөлөлтэй санал солилцож, ноос ноолуурын салбарынхны хүсэлтээр дахин зээл авахын тулд өмнөх зээлийг төлсөн байх шаардлагыг уян хатан болгох боломжийг судлахыг ярилцав.
Банкны салбарын төлөөлөл экспортыг дэмжих чиглэлээр аж ахуйн нэгжүүдтэй хамтран ажиллах, санхүүгийн шинэ бүтээгдэхүүн гаргах, томоохон хөрөнгө оруулалтын гэрээг барьцаалж зээл олгох зэрэг боломжуудыг судлахад бэлэн байгаагаа илэрхийлсэн бөгөөд чанаргүй зээлийн хэмжээ сүүлийн 15 жилд байгаагүйгээр буурч 4.6 хувьд хүрсэн нь ч онцлогтой байна гэжээ.
Монголбанкны Ерөнхийлөгч С.Наранцогт эдгээр боломжуудыг судалж, аж ахуйн нэгжүүдийн санхүүжилтийг үр дүнтэй нэмэгдүүлэхийг дэмжихээ мэдэгдэв.
Уулзалтын үр дүнд Засгийн газар гүн боловсруулалт хийсэн ээрэх үйлдвэр байгуулах төслийг бодлогоор дэмжих, олон улсын нэр хүндтэй үзэсгэлэнд оролцоход туслах, нийслэлд ноолууран бүтээгдэхүүн худалдаалах нэгдсэн цэгийг байгуулах ажлыг дэмжих чиглэлийг ХХААХҮЯ-нд даалгав.
Мөн Сүхбаатар аймагт энэ сарын 21-нд зохион байгуулах ноолуурын дуудлага худалдааны бэлтгэл ажлыг хангах ажлын хэсэг томилжээ. Татварын бодлогоор салбарыг дэмжих боломжийг судалж, санал боловсруулах үүргийг Сангийн яаманд өгсөн байна.
Статистик мэдээллээс үзэхэд, 2025 онд Монгол Улс 4000 тонн самнасан ноолуур экспортолж, өмнөх оноос 5.7 дахин өссөн үзүүлэлттэйгээр 335 сая ам.долларын орлого олжээ. Өнгөрсөн оны эдийн засгийн 6.8 хувийн өсөлтөд хөдөө аж ахуйн салбар нийт өсөлтийн 40 хувийг бүрдүүлж, голлон нөлөөлсөн нь ноос, ноолуурын экспорт байжээ.
Салбарынхан үзэж буйгаар, зээлийн хүртээмжийг сайжруулах, экспортын урамшуулалд хамруулах, худалдан авсан түүхий эд болон экспортын гэрээг барьцаалж зээл олгох зэрэг дэмжлэгийг үзүүлснээр үйлдвэрлэлийн хүчин чадал, экспортын хэмжээг нэмэгдүүлэх боломж бүрдэнэ гэж үзэж байна.
