Украины Ерөнхийлөгч Владимир Зеленский гуравдугаар сарын 2-ны даваа гарагт сэтгүүлчидтэй ярилцах үеэрээ Орос, АНУ, Украин гурван талын оролцоотой, энэ долоо хоногт Абу-Дабид хийхээр төлөвлөсөн хэлэлцээ цуцлагдаагүй ч Ойрхи Дорнод дахь нөхцөл байдал хурцадсантай холбоотойгоор хойшлох магадлалтай талаар мэдэгджээ.
Тэрбээр “Уулзалтыг гуравдугаар сарын 5-наас 8-ны хооронд, ойролцоогоор 5, 6-нд Абу-Дабид хийхээр төлөвлөсөн. Гэвч байлдааны ажиллагааны улмаас уулзалт яг Абу-Дабид болно гэж одоогоор баталж чадахгүй байна. Гэхдээ уулзалтыг цуцлаагүй” хэмээн онцолсон байна.
Зеленский хэлэхдээ, хэлэлцээ зохион байгуулах боломжит байршлуудаар өмнө нь ийм уулзалтууд болж байсан Турк болон Швейцарыг нэрлэж, “Эдгээрийн аль ч байршлыг бид дэмжихэд бэлэн” гэжээ.
Украины төрийн тэргүүний хэлснээр, одоогийн байдлаар түүний улс хамтрагч талуудаас уулзалтын байршлын талаар хариу хүлээж байгаа аж. Тэрбээр “Энэ уулзалт бидний хувьд маш чухал. Уулзалт өөрөө чухал, үр дүн нь чухал, мөн солилцоо маш чухал”
хэмээн онцолжээ.
Bloomberg: Хэлэлцээ Туркт болж магадгүй
Москва дахь эх сурвалж Bloomberg агентлагт “АНЭУ-ын агаарын орон зай пуужин болон нисгэгчгүй онгоцны довтолгооны эрсдэлээс шалтгаалан хаагдсан тул Абу-Дабид хэлэлцээ болох магадлал бага” гэж мэдээлжээ. Тэрбээр нэрээ нууцлахыг хүссэн бөгөөд Истанбул хотыг уулзалтын хувилбар байршил болгон авч үзэж байгааг дурдсан байна.
2026 оны нэгдүгээр сарын сүүлч, хоёрдугаар сарын эхээр Абу-Дабид 2022 оны хоёрдугаар сард дайн эхэлснээс хойшхи анхны гурван талт хэлэлцээ Орос, АНУ, Украины төлөөлөгчдийн оролцоотойгоор болсон. Харин хоёрдугаар сарын дунд үеэр ижил форматтай уулзалтууд Женева хотод болсон билээ.
Истанбулд Орос, Украины хоорондох сүүлчийн хэлэлцээ АНУ-ын оролцоогүйгээр 2025 оны долдугаар сарын сүүлээр болсон бөгөөд тухайн үед талууд цэргүүд болон иргэдийг солилцох асуудлыг хэлэлцсэн талаар Оросын төрийн мэдлийн ТАСС агентлаг мэдээлж байв.
Эх сурвалж: DW
