Ираны Гадаад хэргийн дэд сайд Саид Хатибзаде ням гарагт CNN-д ярилцлага өгч, “АНУ-ын Ерөнхийлөгч Дональд Трамп Ираны дээд удирдагч Али Хаменеиг хөнөөснөөр ‘маш аюултай улаан шугам’-ыг давсан хэрэг” гэж мэдэгджээ.
Хатибзадегийн хэлснээр, Хаменейн амь үрэгдсэнд дэлхий даяарх олон сая шиит шашинтан хариу үйлдэл үзүүлэх нь тодорхой аж.
Тэр “Шашны талаас авч үзвэл тэр бол шашны агуу удирдагч байсан. Тиймээс бүс нутаг болон дэлхий даяарх олон шиит шашинтан үүнд хариу үзүүлэх нь ойлгомжтой. Учир нь, Ерөнхийлөгч Трамп маш аюултай улаан шугамыг давсан” гэж хэлжээ.
Хатибзаде “Бидэнд хариу өгөхөөс өөр сонголт үлдээгүй” хэмээн нэмж мэдэгдсэн байна.
Ойрхи Дорнод даяар хариу цохилт өгсөн нь
Иран бямба гаргийн цохилтуудын дараа Ойрхи Дорнодын бүс нутаг даяар урьд өмнө байгаагүй өргөн хүрээтэй хариу цохилтууд өгсөн байна. Эдгээр цохилт нь АНУ-ын цэргийн бааз байрладаг хэд хэдэн улсыг хамарсан бөгөөд тэдгээрийн дотор Бахрейн, Арабын Нэгдсэн Эмират багтжээ.
Цохилтууд амралтын өдрүүдийн турш үргэлжилж, энгийн иргэд амь үрэгдэх, эд хөрөнгө сүйдэх, агаарын болон усан тээвэр бүрэн зогсоход хүрсэн байна.
Хатибзаде мөн Иран Персийн булангийн араб орнуудтай холбоо тогтоож, Ираны аюулгүй байдалд заналхийлж байна гэж үздэг АНУ-ын цэргийн баазуудын үйл ажиллагааг зогсоохыг шаарджээ.
Тэр “Бид тэдэнд тодорхой хэлсэн: Ираны эсрэг байнга заналхийлж, довтолгоонд ашиглагддаг Америкийн баазуудыг хаах, эс бөгөөс бидэнд хариу цохилт өгөхөөс өөр гарц үлдэхгүй” гэж хэлсэн байна.
Түүний хэлснээр, Иран АНУ-ын нутаг дэвсгэрт шууд цохилт өгөх боломжгүй тул АНУ-ын харьяалалд байдаг гадаад дахь цэргийн баазуудыг онилох шаардлагатай болсон аж.
“Энэ бол сонголтоор эхлүүлсэн дайн”
Дипломат яриа хэлэлцээ хийх боломжтой хэвээр эсэх талаар асуухад Хатибзаде АНУ удаа дараа Ираны “урмыг хугалсан” бөгөөд энэ дайныг эхлүүлэх ямар ч шаардлага байгаагүй гэж мэдэгджээ.
Тэр “Хэрвээ Ерөнхийлөгч Трамп Ираны хариу цохилтыг харахыг хүсээгүй бол эхнээсээ энэ дайныг эхлүүлэх ёсгүй байсан.
Энэ бол зайлшгүй биш, харин сонголтоор эхлүүлсэн дайн” гэж онцолсон байна.
Эх сурвалж: CNN
