Москвад Германы уран барималч, карнавалын уран бүтээлч Жак Тилли (Jacques Tilly)-д холбогдох хэргийн шүүх хурлын ажиллагаа эхэлжээ. Оросын эрх баригчид түүнийг ОХУ-ын армийг “гутаан доромжлох” буюу нэр төрд нь халдсан гэж буруутгаж байгаа аж.
Шүүгч Константин Очиров 2026 оны хоёрдугаар сарын 26-ны пүрэв гарагт прокурорын тайлан, гэрч болон мэргэжилтнүүдийн мэдүүлэг, Тиллид тулгаж буй мөрдөн байцаалтын үр дүнг бараг нэг цагийн турш сонсжээ. Дараагийн шүүх хурал гуравдугаар сарын 16-нд товлогдсон байна.
Энэхүү хэрэг Тиллигийн Дюссельдорфын карнавалд зориулан бүтээсэн карнавалын платформуудтай холбоотойгоор үүсчээ. Уран бүтээлч олон удаа Оросын Ерөнхийлөгч Владимир Путин болон Оросын Украин дахь дайнтай холбоотой үйлдлийг шүүмжилсэн бүтээл туурвисан аж. Түүний хамгийн алдартай бүтээлүүдийн нэг нь Украины төрийн далбааны өнгөөр будсан, цусанд живсэн Путины баримал юм байна.
Шүүхийн хувьд Тилли армийн талаар “худал мэдээлэл” тараасан гэж үзэж байгаа бөгөөд түүний бүтээлүүд нь Путиныг дээд командлагчийн хувьд гутаасан гэж үзэж байгаа аж. Эхний шүүх хурал 2025 оны арванхоёрдугаар сард болох ёстой байсан ч дараа нь 2026 оны нэгдүгээр сарын 28, эцэст нь хоёрдугаар сарын 26-нд товлогджээ. Хэрвээ Тиллиг буруутай гэж үзвэл түүнд мөнгөн торгууль, эсвэл 10 хүртэл жилийн хорих ял оноох магадлалтай аж.
Шүүх хурал дээр 2024 оны Тиллигийн карнавалын платформ, Путин болон патриарх Кириллийг бэлгийн ажил хийж буй байдлаар дүрсэлсэн бүтээлүүдийг нарийвчлан тайлбарласан байна. Мөн гурван гэрч, өөрсдийгөө христийн шашинт эмэгтэйчүүд гэж тодорхойлж, шашны итгэл үнэмшлийг нь гутаан доромжилсон гэж үзсэн мэдүүлгүүдийг уншжээ.
Жак Тилли: Оросын эрх баригчдын зорилго – айлгах
Уран бүтээлчийн хувьд шүүхийн ажиллагаанд тайван хандсан байгаа аж. Германы хэвлэлд өгсөн ярилцлагадаа тэрбээр шүүхийн асуудал түүний ажилд нөлөөлөхгүйг онцолсон байна. Тилли хэлэхдээ, шут буюу шогч уран бүтээлчийн гол үүрэг нь жилд нэг удаа хүмүүсийг шоглон, анхаарал татах үйл явдал зохион байгуулах явдал аж. Тэрбээр WDR телевизэд “Мэдээж бид үүнийг үргэлжлүүлнэ. Одоо айвал инээдэмтэй зүйл болно” гэж ярьжээ.
Тэр мөн шүүхийн үйл ажиллагаа айлган сүрдүүлэх зорилготой гэж үзэж буйгаа хуваалцсан байна. Тилли одоог хүртэл Оросоос албан ёсны мэдэгдэл аваагүй бөгөөд өмгөөлөгч авах бодолгүй байгаа нь шүүхэд ач холбогдол өгөхийг хүсээгүйтэй нь холбоотой аж.
Тэрбээр Оросын шүүхийг “хар хайрцаг” гэж нэрлээд, “Орос бол хууль дүрэмт улс биш учраас шүүхийн үйл ажиллагаа нь жинхэнэ хууль эрх зүйн процесс биш, харин дууриамал, жүжиг мэт болж буйг ойлгохгүй байна” гэжээ. Тэр өөрийгөө нь буруутгаж байгаа үндэслэлүүд бүгд утгагүй бөгөөд “Орос галзуурчээ. Энэ бол жүжиг, буруутгасан үндэслэлүүд нь инээдтэй” гэж хэлсэн байна.
Тиллигийн карнавалын бүтээлүүдэд Путиныг шоронгийн хувцастай, “Путин шорон!” гэж бичсэн зангилаанд хавчуулагдсан байдлаар дүрсэлсэн баримлууд ч багтсан аж. Түүний бүтээлүүд олон улсын анхаарлыг татдаг ба дэлхийн хэвлэл мэдээллийн нүүр хуудсанд ч олонтаа тавигддаг байна.
Шүүх ба Тиллид тулгарах эрсдэлүүд
Тилли урт хугацаандаа энэ хэрэг нь түүнийг өөр улс руу аялах үед, тухайн улс нь Орост шилжүүлэн өгөх гэрээтэй байвал асуудал үүсгэж магадгүй гэж үзэж байгаа аж. Мөн ирээдүйд улс төрийн эрсдэлүүд бий болж магадгүйг ч хэлжээ. Жишээ нь, Германд хэт баруун чиглэлтэй Германы төлөө нам нэгэнт засгийн эрхэнд гарвал ийм зүйл тохиолдох магадлалтай гэж Тилли үзэж буй аж.
Оросын шүүх хурал болж байхад ч Дюссельдорфын карнавалд Тиллигийн гурван платформ дахин тавигдсан бөгөөд бүгд Путинд зориулсан шоглоомын бүтээлүүд байжээ.
Жак Тилли нь Дюссельдорфын карнавалын “Уурласан даваа гариг” жагсаалд зориулсан шог зургийн платформуудын зохиогч бөгөөд тэр бүтээлүүдээрээ дэлхийн улс төрийн удирдагчдыг шоглон харуулдаг аж.
Эх сурвалж: DW
