Хойд Италийн нутагт 16 хоногийн турш үргэлжилж, 116 төрлийн медалийн эзэд тодорсон Милан-Кортинагийн өвлийн олимп спортын ертөнцөд мартагдашгүй олон үйл явдлыг үлдээлээ. Ялалт, ялагдал, шуугиан, түүхэн амжилтаар дүүрэн тус олимпоос онцлох 10 мөчийг хүргэж байна.
Клэбогийн түүхэн амжилт
Норвегийн гүйлтийн цанын тамирчин Йоханнес Хёсфлот Клэбо эрэгтэйчүүдийн бүх зургаан төрөлд алтан медаль хүртэж, нэг олимпоос авсан алтан медалийн тоогоор шинэ дээд амжилт тогтоов. Өмнөх амжилтыг 1980 оны Олимпод америк тамирчин Эрик Хайден таван алтаар тогтоож байжээ.
Норвегийн илт давамгайлал
Норвеги улс нийт 41 медаль хүртэж, багийн нийлбэр дүнгээр тэргүүлсэн. Тус улсын тамирчид энэхүү амжилтаа спортод суурилсан амьдралын хэв маягтайгаа холбон тайлбарлаж байна.
Алисса Люгийн эргэн ирэлт
20 настай Алисса Лю АНУ-д эмэгтэй уран гулгалтаар 24 жилийн дараах анхны олимпын алтан медалийг авчирлаа. Спортоо орхиод дахин эргэн ирсэн түүний түүх олон хүний анхаарлыг татав.
Олимпод улс төрийн сүүдэр туссан нь
АНУ-ын тамирчид Ерөнхийлөгч Дональд Трампын цагаачлалын бодлоготой холбоотой асуултад байнга өртсөн юм. Зарим тамирчин байр сууриа илэрхийлсний улмаас цахим орчинд дарамтад өртжээ.
Украин тамирчны маргаантай хэрэг
Украины скелетон тамирчин Владислав Гераскевич дайнд амь үрэгдсэн тамирчдын дурсгалыг хүндэтгэсэн дуулга зүүхээс татгалзахаас татгалзсаны улмаас тэмцээнд оролцох эрхээ хасуулсан нь маргаан дэгдээв. Олон улсын олимпын хороо үүнийг “талбай дээр улс төрийн мэдэгдэл хийсэн” гэж үзжээ.
Кёрлингийн дуулиан
Кёрлингийн төрөлд Канад, Их Британийн багуудтай холбоотой “давхар хүрэлт”-ийн маргаан үүсч, богино хугацаанд дүрэм хүртэл өөрчлөгдсөн ч удалгүй намжив.
Норвеги тамирчны шуугиант ярилцлага
Биатлоны тамирчин Стурла Холм Легрейд хүрэл медаль авсныхаа дараа хувийн амьдралынхаа талаар илэн далангүй ярьж, олон нийтийн анхаарлын төвд орсон юм.
Бразилын түүхэн анхны алт
Альпийн цанын тамирчин Лукас Пинейру Браатен аварга болж, Өмнөд Америкаас өвлийн олимпын наадамд хүртсэн анхны алтан медалийг Бразил улсад авчирлаа.
Линдси Вонны хүнд бэртэл
Америкийн алдарт уулын цаначин Линдси Вонн 41 насандаа зодог тайлж байгаад эргэн ирсэн ч уруудах төрөлд гараанаас ердөө 13 секундын дараа хаалт мөргөн унаж, хүнд бэртэл авсан юм. Тэрбээр шилбэний нарийн ясаа хугаралж, Италид долоо хоног эмчлүүлсний дараа АНУ-д буцан очиж, хэд хэдэн удаагийн мэс засалд оржээ. Осолдох үед цана нь салж амжаагүй тул аюулгүй байдлын асуудлыг дахин сөхөхөд хүргэв.
Фаворит Малинины уналт
Эрэгтэй уран гулгалтын хамгийн том фаворит Илъя Малинин чөлөөт үзүүлбэрийн үеэр хоёр удаа унаж, түрүүлэх байраас медальгүй үлдэв. Тэрбээр “хэт их өөртөө итгэсэн байж магадгүй” хэмээн тайлбарласан байна.
Эх сурвалж: JAPAN TODAY
