ОХУ Украинд бүрэн хэмжээний довтолгоо эхлүүлсний дөрөв дэх жилийн ойд АНУ-ыг оролцуулсан аж үйлдвэржсэн долоон тэргүүлэх улс, буюу G7, Украинд үзүүлэх дэмжлэг нь тууштай хэвээр байгааг батлав.
Хоёрдугаар сарын 24-ний мягмар гарагт нийтэлсэн хамтарсан мэдэгдэлдээ G7-ийн удирдагчид Украинд “нутаг дэвсгэрийн бүрэн бүтэн байдал, оршин тогтнох эрх, эрх чөлөө, бүрэн эрхт байдал, тусгаар тогтнолоо хамгаалахад цаашид тусламж үзүүлнэ” хэмээн амалсан байна.
АНУ-ын Ерөнхийлөгчийн энхийн санаачилгыг дэмжив
Мэдэгдэлд АНУ-ын Ерөнхийлөгч Дональд Трампын санаачилсан энхийн үйл явц, мөн Украин болон Оросын хооронд шууд хэлэлцээ явуулах оролдлогыг үргэлжлүүлэн дэмжиж буйг онцолсон байна. Баримт бичигт “Энэ үйл явцад Европ тэргүүлэх үүрэг гүйцэтгэж байгаа бөгөөд бусад түншүүд ч нэгдэж байна” гэж дурджээ.
G7-ийн мэдэгдэлд дурдсанаар, дайныг зогсоох хэлэлцээрийг шууд хэлэлцээний үр дүнд байгуулах боломж зөвхөн Украин болон Орос улсад л бий гэж тэмдэглэжээ. Мөн тэд “Сайн дурынхны эвсэл”-ийн хүрээнд Украинд найдвартай, бодитой аюулгүй байдлын баталгаа олгох үүргээ дахин нотолсон байна.
Украины эрчим хүчний дэд бүтцэд үзүүлэх дэмжлэг
G7-ийн удирдагчид энэ өвөл Украины эрчим хүчний дэд бүтцэд чиглэсэн довтолгоо эрчимжсэнтэй холбогдуулан тус улсад үзүүлж буй дэмжлэгийн хүчин чармайлтыг сайшаажээ.
Мэдэгдэлд мөн “цөмийн аюулгүй байдлыг хангах чиглэлээр нягт хамтран ажиллах”, үүнд Европын Сэргээн босголт, хөгжлийн банк болон Украинтай хамтран Чернобылийн АЦС-ын хамгаалалтын бүрхүүлийг богино хугацаанд сэргээхэд шаардлагатай санхүүжилтийг бүрдүүлэх, бүх Европ тивд ноцтой хүмүүнлэгийн болон байгаль орчны үр дагавар учруулах аливаа цацрагийн ослоос урьдчилан сэргийлэх зорилт багтсан гэж дурдсан байна.
Мөн уг баримт бичигт “украин хүүхдүүдийг нэн даруй, аюулгүй, ямар нэгэн болзолгүйгээр эх оронд нь буцаах” санаачилгуудыг дэмжиж буйг онцолжээ.
Дональд Трамп эргэн ирсний дараах анхны хамтарсан мэдэгдэл
Энэ нь Дональд Трамп нэг жилийн өмнө Цагаан ордонд эргэн ирснээс хойших G7-ийн анхны хамтарсан мэдэгдэл бөгөөд G7-г даргалж буй Франц улс энэ тухай сануулжээ.
G7-ийн бүрэлдэхүүнд АНУ, Канад, Итали, Япон, Их Британи, Герман, Франц улсууд багтдаг. Эдгээрээс Их Британи, Герман, Франц гурван улс тус тусдаа мэдэгдэл гарган, Украинд шударга, урт хугацааны тогтвортой энх тайван тогтоохын төлөө тууштай байр суурь баримталж буйгаа дахин илэрхийлсэн байна.
Эх сурвалж: DW
