Украины Ерөнхийлөгч Владимир Зеленский лхагва гарагт мэдэгдэхдээ, хэрэв дайныг зунаас өмнө дуусгахыг хүсвэл АНУ ОХУ-д илүү их дарамт үзүүлэх шаардлагатай гэж хэлжээ.
Тэрбээр ирэх долоо хоногт АНУ-ын зуучлалаар болох энхийн хэлэлцээнд Москва оролцох эсэх нь тодорхойгүй хэвээр байгааг дурджээ.
Украины удирдагч “Өмнө нь Вашингтон дөрвөн жил үргэлжилж буй дайныг зургадугаар сар гэхэд дуусгахыг хүсэж байна гэж мэдэгдэж байсан. Мөн Орос улс Майамид зохион байгуулахаар санал болгосон гурван талт хэлэлцээний дараагийн шатанд оролцох эсэхээ одоогийн байдлаар хэлэлцэж байна” гэж хэлсэн аж.
Зеленский Украин уулзалтад оролцоход бэлэн болохыг онцолжээ. Энэ уулзалт нь өнгөрсөн сард Абу Дабид болсон гурван талт хэлэлцээний хоёр дахь шатны дараа зохион байгуулагдах бөгөөд өмнөх хэлэлцээнүүдийн үеэр бодит ахиц гаргаж чадаагүй билээ.
Тэр “Зөвхөн Украин бус, мөн Америкт ч хамаатай. Уучлаарай, ингэж хэлж байгаад. Өөр арга байхгүй. Америк Орост дарамт үзүүлэх ёстой” гэж зунаас өмнө энхийн хэлэлцээр байгуулах боломжийн талаар хэлжээ.
Кремль мягмар гарагт дараагийн хэлэлцээний тодорхой огноо хараахан товлогдоогүй ч тун удахгүй болно гэж мэдэгдсэн байна.
Асуудалд ойр гурван эх сурвалж Reuters-т хэлэхдээ, АНУ-ын албаныхан Майамид даваа, мягмар гарагт гурван талт уулзалт зохион байгуулах санал тавьсан гэжээ. Цагаан ордон дараагийн хэлэлцээ хэзээ болох талаар тайлбар өгөхөөс татгалзсан байна.
Зеленский мөн “Financial Times” сонинд хоёрдугаар сарын 24-нд (Оросын бүрэн хэмжээний халдлагын дөрвөн жилийн ой) гарсан “Ерөнхийлөгчийн сонгууль болон энхийн хэлэлцээрийн талаарх бүх нийтийн санал асуулга зарлана” гэсэн мэдээллийг няцаажээ.
Тэрээр барууны холбоотнуудаас, ялангуяа АНУ-аас аюулгүй байдлын зохих баталгаа авсны дараа л Украин сонгууль явуулна гэж WhatsApp-аар хийсэн мэдээллийн үеэр сэтгүүлчдэд хэлсэн аж.
“Financial Times” Украин болон Европын албан тушаалтнуудын мэдээлээс эш татан, энхийн хэлэлцээрийн талаарх санал асуулгатай хамт ерөнхийлөгчийн сонгууль зохион байгуулах бэлтгэл эхэлсэн гэж уламжилсан байна.
Энэ талаар асуухад Зеленский “Хоёрдугаар сарын 24-нд ийм мэдэгдэл хийнэ гэсэн мэдээллийг анх удаа сонсож байна” гэж хэлээд, “Улс төрийн тухай ярих ийм өдрийг сонгох нь туйлын тэнэг санаа” гэж мэдэгджээ. Мөн тэр “Эхлээд аюулгүй байдал, дараа нь улс төр” гэж онцолсон байна.
Эх сурвалжийн хэлснээр, Оростой энхийн хэлэлцээрийн нөхцөлийг эхлээд тохиролцоогүй тохиолдолд Зеленский сонгууль, санал асуулга эхлүүлэх боломжгүй аж. Мөн сонгуулийн кампанит ажлын турш гал зогсоох хэлэлцээр хэрэгжихийг Киев хүсэж буй юм байна.
Эх сурвалж “Оросууд тохиролцоонд хүрэхгүй, дайныг зогсоох алхам хийхгүй байгаа үед сонгууль зохион байгуулах боломжгүй” гэж хэлжээ.
Украин, АНУ-ын хэлэлцэгчдийн боловсруулж буй 20 заалт бүхий энхийн тухай баримт бичигт аль болох хурдан сонгууль зохион байгуулах асуудал багтсан байна.
Абу Дабид болсон хэлэлцээний үеэр Донбассын бүс нутгийн асуудлаар тохиролцоонд хүрч чадаагүй бөгөөд өвлийн хүнд нөхцөлд Орос Украин руу, ялангуяа эрчим хүчний байгууламжууд руу довтолгоогоо үргэлжлүүлж байна гэж эх сурвалжууд хэлжээ.
Орос улс энхийн аливаа хэлэлцээрийн хүрээнд Донбассын бүх хэсгийг хяналтдаа авахыг хүсэж байгаа бол одоогийн байдлаар 5180 км² гаруй газар нутгийг хянаж буй Украин үүнийг хүлээн зөвшөөрөхгүйгээ мэдэгдсэн.
Гэсэн ч Украины тал цэрэггүй бүс, эсвэл чөлөөт худалдааны бүс байгуулах зэрэг хувилбарыг судлахад нээлттэй байгаагаа илэрхийлсэн аж.
Зеленский бямба гарагт “АНУ-ын Конгрессын дунд хугацааны сонгууль ойртож байгаа тул дайныг зунаас өмнө дуусгах шийдэл олохыг Вашингтон хүсэж байна” гэж хэлжээ.
Reuters өмнө нь мэдээлэхдээ, хэлэлцэж буй асуудлын дагуу энхийн гэрээг бүх нийтийн санал асуулгаар баталгаажуулж, сонгуультай хамт зохион байгуулах боломжийг авч үзэж байгаа аж.
Эх сурвалжуудын хэлснээр, ийм санал асуулга, сонгуулийг тавдугаар сард зохион байгуулах хувилбарын талаар ярилцсан ч энхийн гэрээ байхгүй, зохион байгуулалтын бэрхшээл их тул бодит бус гэж үзэж буй юм байна.
Украины хууль тогтоогчид, шинжээчид сонгууль явуулахад шаардлагатай хууль эрх зүйн өөрчлөлтийн санал боловсруулах ажлын хэсэг байгуулжээ.
АНУ-ын Ерөнхийлөгч Дональд Трамп сонгууль явуулахыг хүсэж байгаа ч 2022 оны довтолгооноос хойш хүчин төгөлдөр байгаа цэргийн онц байдлын үед сонгууль хийхийг хориглосон бөгөөд украинчуудын олонх нь дайны үеэр сонгууль явуулахыг эсэргүүцэж буй аж.
Эх сурвалж: JAPAN TODAY
