Төрийн өмчит компаниудын ТУЗ-ийн хараат бус гишүүдийн тоо өсч, ашигт ажиллагаа сайжирчээ.
Монгол Улсын төрийн өмчит компаниудын ашигт ажиллагааг дээшлүүлэх, төрийн оролцоо болон улс төрийн нөлөөллийг багасгах чиглэлд томоохон алхамууд хийгдэж байна.
Судлаачдын дүгнэж байгаагаар, Төлөөлөн Удирдах Зөвлөлийн (ТУЗ) хараат бус гишүүний тоог нэмэгдүүлэх нь компанийн удирдлагын бие даасан байдлыг хангахад хамгийн чухал хүчин зүйл болж буй аж.
Төрийн өмчийн бодлого, зохицуулалтын газраас 2025 оны эцсийн байдлаар, 56 төрийн өмчит компанид нийт 504 ТУЗ-ийн гишүүн ажиллаж байснаас 168 нь хараат бус байсан талаар мэдээлсэн.
Тухайлбал, “Эрдэнэс Монгол” нэгдлийн 11 гишүүнтэй ТУЗ-д тав нь хараат бус гишүүн байгааг тэмдэглэжээ. Мөн “Эрдэнэс Тавантолгой” ХК-ийн 9 гишүүний дөрөв нь хараат бус.
Эрчим хүчний салбарын төрийн өмчит компаниуд ТУЗ-ийн гишүүдийн тоог бууруулж, илүү үр дүнтэй зохион байгуулалттай болгосноор жилд 2 тэрбум төгрөгийн зардал хэмнэсэн байна. Тухайлбал,
“Эрчист Монгол” компанийн Гүйцэтгэх захирал Г.Амартүвшин “ТУЗ-ийн гишүүдийн тоог 27-оос 14 болгон бууруулсан” гэж мэдээлсэн юм.
Эдийн засгийн бодлого, өрсөлдөх чадварын судалгааны төв цаашид хараат бус байдлыг сайжруулах зорилгоор ТУЗ-ийн гишүүдийг нээлттэй сонгон шалгаруулах, олон нийтэд ил тод мэдээлэх, хараат бус аудиторыг ТУЗ-ийн шийдвэрээр томилж, чөлөөлөх үйл ажиллагааг ил тод байлгах зэрэг зөвлөмжийг танилцуулсан байна.
Төрийн өмчит компаниудын 2024 оны тайланд дурдсанаар, нийт орлого 26 их наяд төгрөгт хүрч, үүнээс 5.7 их наяд төгрөгийн цэвэр ашигтай ажиллажээ.
Гэсэн хэдий ч 22.8 их наяд төгрөгийн өр төлбөртэй байсан нь засаглалын бүтцийг сайжруулах шаардлагатайг харуулж буй юм.
Энэхүү арга хэмжээ нь төрийн өмчит компаниудын ил тод байдал, ашигт ажиллагааг дээшлүүлэх, хөрөнгө оруулагчдын итгэлийг нэмэгдүүлэх чухал алхам болж байна гэж албаныхан дүгнэж байна.
